ຕາມຂ່າວຈາກ ວິທະຍຸ ສາກົນ ຫວຽດນາມ, ອິນໂດເນເຊຍ ໄດ້ນຳສະເໜີ ສ້າງຖະແຫລງການ ບັນດາ ການນຳ ອາຊຽນ ເພື່ອແນໃສ່ ເພີ່ມທະວີ ການຮ່ວມມື ຍຸດທະສາດ ໃນການສ້າງກົນໄກ ເພີ່ມທະວີ ການຄ້ຳປະກັນ ສະບຽງ ອາຫານ, ລະບົບ ການສະໜອງ ພາກພື້ນ ແລະ ກະສິກຳ ແບບຍືນຍົງ. ພາຍຫລັງ ໄດ້ຈັດກອງປະຊຸມ ອາຊຽນ ກ່ຽວກັບ ການເພີ່ມທະວີ ການເຊື່ອມໂຍງ ການຄ້ຳປະກັນ ສະບຽງອາຫານ ຈັດຂຶ້ນ ແບບທາງໄກ ເມື່ອບໍ່ດົນມານີ້, ທ່ານ Kasdi Subagyono,ເລຂາທິການໃຫຍ່ ກະຊວງ ກະສິກຳ ອິນໂດເນເຊຍ ເປີດເຜີຍວ່າ: ບັນດາ ສິ່ງທ້າທາຍ ທົ່ວໂລກ ໃນປະຈຸບັນ ຊຸກຍູ້ ອາຊຽນ ກະທຳ ຢ່າງຮີບດ່ວນ, ທັງໃນ ໄລຍະສັ້ນ, ໄລຍະກາງ ແລະ ໄລຍະຍາວ ເພື່ອຍູ້ໄວ ແລະ ປັບປຸງ ລະບົບ ສະບຽງອາຫານ ໃຫ້ມີປະສິດທິຜົນ, ຮອບດ້ານ, ສ້າງຄວາມ ເຂັ້ມແຂງດ້ວຍຕົນເອງ ແລະ ຍືນຍົງຫລາຍກ່ວາເກົ່າ.ສຳລັບ ຖະ ແຫລງການນີ້ ຈະປະກອບສ່ວນ ສ້າງຄວາມ ເປັນເອກະພາບ ກ່ຽວກັບ ບົດບາດ ຂອງບັນດາ ຂະແໜງການ ກ່ຽວຂ້ອງ ລວມມີ: ສະບຽງ ອາຫານ, ເສດຖະກິດ, ຄົມມະນາຄົມ ຂົນສົ່ງ ແລະ ການເງິນ. ສິ່ງນັ້ນ ໄດ້ສ້າງການຮ່ວມມື ຢ່າງໜັກແໜ້ນ ແລະ ກຳລັງແຮງ ສັງລວມ ເພື່ອແນໃສ່ ຮັບມືກັບ ບັນດາ ສິ່ງທ້າທາຍລວມ. ຄາດວ່າ, ຖະແຫລງການ ຈະໄດ້ຍົກອອກມາ ທີ່ກອງປະຊຸມ ສຸດຍອດ ອາຊຽນ ຄັ້ງທີ 43 ໃນເດືອນ ກັນຍາ ປີນີ້
ຂ່າວໂດຍ:ປະເທດລາວ Pathedlao