ແຂວງຊຽງຂວາງ ເຈົ້າພາບຈັດງານມະຫະກຳກິລາ ແຫ່ງຊາດ ຄັ້ງທີ XI (ຊຽງຂວາງເກມ) ໄດ້ເອົາໃຈໃສ່ທຸກດ້ານ ເພື່ອໃຫ້ ຊຽງຂວາງເກມ ປອດຄວັນຢາສູບ ໂດຍສະເພາະໄດ້ວາງມາດຕະການ ຖ້າພົບເຫັນຜູ້ລະເມີດ ສູບຢາໃນສະຖານທີ່ຕ້ອງຫ້າມ ກໍຈະມີການປັບໃໝເປັນເງິນ 400,000 ກີບ.
ທ່ານ ບຸນທັນ ວັນທະລີວົງ ວິຊາການສື່ສານເພື່ອສຸຂະພາບ-ສຸຂະສຶກສາ ພະແນກສາທາລະນະສຸກແຂວງຊຽງຂວາງ ຜູ້ປະສານງານວຽກງານປອດຄວັນຢາສູບຂັ້ນແຂວງ ໃຫ້ສຳພາດເມື່ອບໍ່ດົນຜ່ານມາວ່າ: ໃນໄລຍະການກະກຽມເປັນເຈົ້າພາບງານກິລາແຫ່ງຊາດຄັ້ງນີ້ ກໍໄດ້ມີການປະຊຸມປຶກສາຫາລືວຽກງານຄວບຄຸມຢາສູບຢູ່ຂັ້ນແຂວງ ພ້ອມນັ້ນກໍໄດ້ອົບຮົມໃຫ້ບັນດາທຸລະກິດບໍລິການ ເຮືອນພັກ, ໂຮງແຮມ, ຮ້ານອາຫານ, ຮ້ານກິນດື່ມ, ຮ້ານບັນເທີງ, ສະຖາບັນການສຶກສາ ແລະ ອົບຮົມໃຫ້ເຈົ້າໜ້າທີ່ຜູ້ທີ່ຈະມາຮັບຜິດຊອບໜ້າທີ່ພາຍໃນງານ ເພື່ອບໍ່ໃຫ້ມີການລະເມີດ ຊຶ່ງຖ້າພົບເຫັນຜູ້ລະເມີດ ສູບຢາຢູ່ສະຖານທີ່ຕ້ອງຫ້າມ ຈະມີການປັບໃໝເປັນເງິນສູງສຸດ 400.000 ກີບ. ນອກນັ້ນ, ກໍໄດ້ປຸກລະດົມພໍ່ແມ່ປະຊາຊົນຜ່ານຊ່ອງທາງສື່ຕ່າງໆ ກ່ຽວກັບການຫ້າມສູບຢາໃນສະຖານທີ່ຕ້ອງຫ້າມ ແລະ ເຜີຍແຜ່ຜົນຮ້າຍຂອງຢາສູບ.
ຂະນະທີ່ ກິດຈະກຳຫຼັກ ເພື່ອໃຫ້ຊຽງຂວາງເກມປອດຄວັນຢາສູບ ຊຶ່ງໃນມື້ເປີດງານ ກໍແມ່ນໄດ້ມີຂະບວນກ້ອນກຳລັງປອດຄວັນຢາສູບ ເດີນສວນສະໜາມ ໂດຍມີອາສາສະໜັກປະກອບສ່ວນເຂົ້າໃນກ້ອນກຳລັງຈຳນວນ 100 ຄົນ ຖືປ້າຍໃນການສົ່ງເສີມບໍ່ໃຫ້ຄົນສູບຢາ ໂດຍສະເພາະແມ່ນປ້າຍ ຍິນດີຕ້ອນຮັບສູ່ການແຂງຂັນກິລາແຫ່ງຊາດຄັ້ງທີ XI ປອດຄວັນຢາສູບ ແລະ ຍັງມີໂຕກາຕູນ Mascot ສົ່ງເສີມປອດຄັວນຢາສູບຄື ທ້າວ ກະທິ ກັບ ນາງ ນໍ້າຫວານ ຊຶ່ງໄດ້ກາຍເປັນສີສັນໃນງານຄັ້ງນີ້. ນອກຈາກນັ້ນ, ກໍຍັງມີກິດຈະກໍາປິ່ນອ້ອມ ກໍຄືການຕັ້ງເຕັ້ນໂຄສະນາກ່ຽວກັບຜົນຮ້າຍຂອງຢາສູບ ຫ້າມສູບຢາໃນບໍລິເວນຕິດປ້າຍຫ້າມສູບ ຫ້າມນຳຢາສູບເຂົ້າໄປໃນສະໜາມກິລາໄຫຫີນ ທັງຢາສູບທົ່ວໄປ ແລະ ຢາສູບໄຟຟ້າ ໂດຍໄດ້ສົມທົບກັບເຈົ້າໜ້າທີ່ ທີ່ປະຈຳຢູ່ຈຸດເຂົ້າງານ ຊຶ່ງຜ່ານມາ ກໍເຫັນເຈົ້າໜ້າທີ່ໄດ້ຢືດເອົາຢາສູບ ແລະ ອຸປະກອນຢາສູບໄຟຟ້າ.
ທ່ານ ບຸນທັນ ວັນທະລີວົງ ຍັງກ່າວຕື່ມວ່າ: ນອກນີ້, ຢູ່ສະໜາມແຂ່ງຂັນທົ່ວໄປ ກໍໄດ້ຕັ້ງຈຸດໂຄສະນາ ແລະ ແຈກຢາຍສະຕິກເກີ ຫ້າມສູບຢາ; ພ້ອມນັ້ນ, ກໍສືບຕໍ່ຕິດປ້າຍຫ້າມສູບຢາຕາມຈຸດຕ່າງໆ ເພື່ອເຮັດໃຫ້ຜູ້ມາຊົມກິລາພາຍໃນງານ ເຫັນໄດ້ຢ່າງຈະແຈ້ງ. ຢ່າງໃດກໍຕາມ, ພວກເຮົາກໍຈະໄດ້ສົມທົບກັບພາກສ່ວນກ່ຽວຂ້ອງ ສືບຕໍ່ຕິດຕາມກວດກາ ຫາກພົບເຫັນກໍຈະມີການປັບໃໝຕາມມາດຕະການທີ່ກໍານົດໄວ້ ເພື່ອເຮັດໃຫ້ງານກິລາແຫ່ງຊາດຄັ້ງນີ້ ປອດຄວັນຢາສູບ ແລະ ບັນລຸຕາມເປົ້າໝາຍ.
(ຂ່າວ-ພາບ: ທີມຂ່າວໜັງສືພິມປະຊາຊົນ)