ແຫລ່ງຂ່າວຈາກ ແຂວງອັດຕະປື ໃຫ້ຮູ້ວ່າ: ໃນໄລຍະ 1 ປີ ຜ່ານມາ, ແຂວງອັດຕະປື ໄດ້ດໍາເນີນກິດຈະກຳຢ່າງຕັ້ງໜ້າຕາມແຜນການ ເຮັດໃຫ້ວຽກງານສົ່ງເສີມການທ່ອງທ່ຽວ ມີຄວາມຄືບໜ້າຫລາຍ ໂດຍສາມາດດຶງດູດນັກທ່ອງທ່ຽວໄດ້ 160.067 ຄົນ (ພາຍໃນ 31.217 ຄົນ, ຊາຍແດນ 91.096 ຄົນ, ສາກົນ 37.754 ຄົນ) ທຽບໃສ່ແຜນການປະຕິບັດໄດ້ 113,84%, ສາມາດສ້າງລາຍຮັບໄດ້ 74 ຕື້ກີບ, ທຽບໃສ່ແຜນການປະຕິບັດໄດ້ 113,84% ຕິດພັນກັບການຈັດງານສໍາຄັນຕ່າງໆ ເຊັ່ນ: ບຸນລະນຶກບຸນຄຸນພະເຈົ້າໄຊຍະເຊດຖາທິຣາດ, ສະເຫລີມສະຫລອງປີທ່ອງທ່ຽວລາວ 2024 ແລະ ໄດ້ເຂົ້າຮ່ວມວາງສະແດງຜະລິດຕະພັນ ການທ່ອງທ່ຽວລະດັບພາກພື້ນ ເພື່ອໂຄສະນາແຫລ່ງທ່ອງທ່ຽວຂອງແຂວງ ໃຫ້ເປັນທີ່ຮູ້ຈັກຢ່າງກວ້າງຂວາງ.
ທ່ານ ອ໋ອງຄຳ ຄູນສະໄໝ ຮອງຫົວໜ້າພະແນກວັດທະນະທຳ ແລະ ທ່ອງທ່ຽວແຂວງອັດຕະປື ໄດ້ລາຍງານກອງປະຊຸມສະຫລຸບວຽກງານປະຈຳປີ 2025 ແລະ ແຜນການປີ 2026 ພາຍໃຕ້ຄໍາຂວັນ “ທັນສະໄໝ ອະນຸລັກ ປະທັບໃຈ” ໃນທ້າຍອາທິດຜ່ານມາວ່າ: ນອກນີ້, ຍັງໄດ້ພັດທະນາແຫລ່ງທ່ອງທ່ຽວ, ສໍາຫລວດຂຶ້ນບັນຊີແຫລ່ງທ່ອງທ່ຽວໄດ້ 90 ແຫ່ງ ທຽບໃສ່ແຜນການປະຕິບັດໄດ້ 100%; ສໍາຫລວດ ແລະ ກໍານົດຂອບເຂດສໍາລັບໂຄງການຕ່າງໆ ເຊັ່ນ: ອ່າງນໍ້າເຂື່ອນເຊກະໝານ 1, ສວນອະນຸສອນສະຖານລົດຕັງປາງສົງຄາມ ເພື່ອກະກຽມການພັດທະນາໃນອະນາຄົດ ແລະ ໄດ້ລົງສໍາຫລວດຖ້ຳພູແດງ, ເສັ້ນທາງໂຮ່ຈີ່ມິງ ລວມທັງການເປີດປະມູນ ການສໍາປະທານພັດທະນາແຫລ່ງທ່ອງທ່ຽວຕາດແຊພະ ແລະ ຕາດແຊປ້ອງໄລ, ເອົາໃຈໃສ່ຄຸ້ມຄອງແຫລ່ງທ່ອງທ່ຽວຢ່າງຕໍ່ເນື່ອງ ໂດຍໄດ້ອອກໃບອະນຸຍາດໃໝ່ 2 ຫົວໜ່ວຍ ແລະ ສືບຕໍ່ໃບອະນຸຍາດ 13 ຫົວໜ່ວຍ, ໄດ້ສົມທົບກັບພາກສ່ວນທີ່ກ່ຽວຂ້ອງລົງຕິດຕາມ, ກວດກາ ແລະ ປະເມີນດ້ານມາດຕະຖານ ຂອງສະຖານບໍລິການເປີດໃໝ່ ກ່ອນອອກອະນຸຍາດດໍາເນີນທຸລະກິດທ່ອງທ່ຽວ 2 ຫົວໜ່ວຍ. ພ້ອມນີ້, ໄດ້ລົງຕິດຕາມກວດກາການບໍລິການ ແລະ ແກ້ໄຂຫົວໜ່ວຍທີ່ລະເມີດລະບຽບການ 2 ຫົວໜ່ວຍ ແລະ ໄດ້ອອກແຈ້ງການໃຫ້ຫົວໜ່ວຍທຸລະກິດ ປະຕິບັດຕາມໂມງເວລາເປີດ-ປິດຢ່າງເຂັ້ມງວດ.
ພາບຈາກ:INTHY EXPLORER
ທ່ານ ອ໋ອງຄຳ ຄູນສະໄໝ ໃຫ້ຮູ້ຕື່ມວ່າ: ໄລຍະ 1 ປີຜ່ານມາ, ຂະແໜງວັດທະນະທຳ ແລະ ທ່ອງທ່ຽວ ໄດ້ປະຕິບັດຕາມແຜນພັດທະນາເສດຖະກິດ-ສັງຄົມ ຄັ້ງທີ IX ຂອງແຂວງອັດຕະປື (2021-2025) ຕາມພາລະບົດບາດ ໂດຍໄດ້ສຸມໃສ່ຈັດຕັ້ງປະຕິບັດ ແຜນພັດທະນາວຽກງານວັດທະນະທຳ ແລະ ທ່ອງທ່ຽວ ໃຫ້ມີຜົນສໍາເລັດຢ່າງເປັນຮູບປະທຳ ໂດຍສະເພາະ ໄດ້ດຳເນີນກິດຈະກຳຢ່າງຕັ້ງໜ້າຕາມແຜນການທີ່ວາງໄວ້; ໄດ້ສືບຕໍ່ສົ່ງເສີມການສ້າງຄອບຄົວວັດທະນະທໍາ ໄດ້ 1.141 ຄອບຄົວ, ເທົ່າກັບ 190,16% ຂອງແຜນການ; ສ້າງບ້ານວັດທະນະທໍາ ໄດ້ 3 ບ້ານ, ເທົ່າກັບ 50% ຂອງແຜນການ ປະເມີນຄືນບ້ານວັດທະນະທໍາທີ່ປະກາດໄປແລ້ວ 13 ບ້ານ, ເທົ່າກັບ 130% ຂອງແຜນການ; ໄດ້ຊຸກຍູ້ເມືອງສະໜາມໄຊ ຈັດພິທີປະກາດບ້ານວັດທະນະທໍາ 3 ບ້ານ ທີ່ສ້າງສຳເລັດຕັ້ງແຕ່ປີ 2024 ແລະ ໄດ້ສຸມໃສ່ການອະນຸລັກມໍລະດົກ ວັດທະນະທໍາ ທີ່ເປັນເອກະລັກຂອງທ້ອງຖິ່ນ ເຊັ່ນ: ການສະເໜີພິຈາລະນາຢັ້ງຢືນແບບສາລາໂຮງທໍາ ແລະ ພະທາດ ເຈດີ ວັດບ້ານອິນທີ ເມືອງສະໜາມໄຊ, ວາງແຜນບູລະນະປະຕິສັງຂອນວັດຫລວງ ເມືອງໄຊເສດຖາ ແລະ ສ້າງແຜນການລົງເກັບກຳຂໍ້ມູນເຮືອນເຜົ່າຕັ້ງເດີມ ຂອງບັນດາເຜົ່າຕ່າງໆ ເພື່ອເປັນຂໍ້ມູນພື້ນຖານໃນການອະນຸລັກ ພ້ອມທັງມີການຮ່ວມມືກັບພາກສ່ວນຕ່າງໆ ເພື່ອສົ່ງເສີມສິລະປະ-ວັດທະນະທຳ, ລວມທັງການຈັດຝຶກອົບຮົມສິລະປະພື້ນເມືອງໃຫ້ເຍົາວະຊົນ ເຊັ່ນ: ມີການຮ່ວມມືກັບຄະນະວິທະຍາໄລແຫ່ງຊາດ ລົງເກັບກຳຂໍ້ມູນ ສິລະປະພື້ນບ້ານຢູ່ 2 ເມືອງ (ສາມັກຄີໄຊ ແລະ ພູວົງ) ແລະ ໄດ້ຮ່ວມກັບໂຄງການມູນລະນິທິ ມໍລະດົກລາວ ຈັດຝຶກອົບຮົມສິລະປະພື້ນເມືອງໃຫ້ກັບເຍົາວະຊົນ ເພື່ອປູກຈິດສຳນຶກ ໃນການອະນຸລັກຮັກສາສິລະປະ-ວັດທະນະທຳ, ເຄື່ອນໄຫວສິລະປະການສະແດງຮັບໃຊ້ງານສໍາຄັນຕ່າງໆ 07 ຄັ້ງ, ອອກໃບອະນຸຍາດ ການສະແດງໃຫ້ສິລະປິນຕ່າງປະເທດ 1 ຄັ້ງ ແລະ ອະນຸຍາດການສະແດງກາງແຈ້ງໃນບຸນຕ່າງໆ 2 ຄັ້ງ, ໄດ້ປະກອບສ່ວນຢ່າງຕັ້ງໜ້າໃນການຈັດບຸນປະເພນີ ແລະ ກິດຈະກຳສໍາຄັນຕ່າງໆ ຂອງແຂວງ ເຊັ່ນ: ບຸນປີໃໝ່ລາວ, ງານປະກວດສິລະປະການສະແດງ, ງານສະແດງສິລະປະຮັບໃຊ້ວຽກງານ ສໍາຄັນຂອງພັກ-ຂອງຊາດ, ຈັດພິທີມອບ-ຮັບ ແລະ ສົມໂພດຫໍຫລັກເມືອງແຂວງອັດຕະປື.
ທີ່ມາ: ປະເທດລາວ