ໃນວັນທີ 31 ມັງກອນ 2026 ທີ່ຜ່ານມາ, ບໍລິສັດ SpaceX ຂອງ ອີລອນ ມັສກ໌ (Elon Musk) ໄດ້ຍື່ນເອກະສານຕໍ່ຄະນະກຳມະການການສື່ສານແຫ່ງສະຫະລັດອາເມຣິກາ ຫຼື FCC ເພື່ອຂໍອະນຸມັດໂຄງການພັດທະນາເຄືອຂ່າຍດາວທຽມ ທີ່ເຮັດໜ້າທີ່ເປັນ ສູນຂໍ້ມູນປັນຍາປະດິດ (AI Data Center) ໃນວົງໂຄຈອນ ໂດຍໃຊ້ພະລັງງານແສງອາທິດເປັນແຫຼ່ງພະລັງງານຫຼັກ. ແນວຄິດດັ່ງກ່າວສະທ້ອນໃຫ້ເຫັນເຖິງຄວາມພະຍາຍາມໃນການຍ້າຍໂຄງສ້າງພື້ນຖານ AI ອອກຈາກໜ້າໂລກ ເພື່ອຫຼຸດຜ່ອນຂໍ້ຈຳກັດດ້ານພະລັງງານ ແລະ ສິ່ງແວດລ້ອມໃນໄລຍະຍາວ.
ແຜນດາວທຽມລະດັບລ້ານດວງ ແລະ ເຫດຜົນທາງເຕັກນິກ
ເອກະສານທີ່ຍື່ນຕໍ່ FCC ລະບຸວ່າ SpaceX ຂໍອະນຸຍາດປ່ອຍດາວທຽມສູງສຸດເຖິງ 1 ລ້ານດວງ ເພື່ອຮອງຮັບການຮັບພະລັງງານແສງອາທິດ ແລະ ການປະມວນຜົນຂໍ້ມູນ AI ໃນລະດັບຂະໜາດໃຫຍ່. ເຖິງວ່າຕົວເລກດັ່ງກ່າວຈະເບິ່ງຄືວ່າສູງກວ່າຄວາມເປັນຈິງຫຼາຍ ເມື່ອທຽບກັບຈຳນວນດາວທຽມທົ່ວໂລກໃນປັດຈຸບັນທີ່ມີປະມານ 15,000 ດວງ, ແຕ່ໃນທາງອຸດສາຫະກຳ ການຂໍອະນຸຍາດໃນລະດັບເພດານສູງຖືເປັນແນວທາງປະຕິບັດປົກກະຕິ ເພື່ອເປີດໂອກາດໃຫ້ມີຄວາມຢືດຢຸ່ນໃນການອອກແບບ ແລະ ການຂະຫຍາຍລະບົບໃນອະນາຄົດ.
ຄວາມເຊື່ອມໂຍງກັບການຄວບລວມ SpaceX ແລະ xAI
ການຍື່ນເອກະສານນີ້ເກີດຂຶ້ນພຽງໜຶ່ງວັນ ຫຼັງຈາກສຳນັກຂ່າວ Reuters ລາຍງານວ່າ SpaceX ແລະ ບໍລິສັດ xAI ຂອງ ອີລອນ ມັສກ໌ ກຳລັງຢູ່ໃນຂັ້ນຕອນການເຈລະຈາເພື່ອຄວບລວມກິດຈະການ ກ່ອນການສະເໜີຂາຍຮຸ້ນຕໍ່ສາທາລະນະ (IPO) ຄັ້ງໃຫຍ່ທີ່ອາດຈະເກີດຂຶ້ນພາຍໃນປີນີ້. ຫາກການຄວບລວມເກີດຂຶ້ນຈິງ ຈະຊ່ວຍເສີມພະລັງໃຫ້ໂຄງການສູນຂໍ້ມູນ AI ໃນອາວກາດມີຄວາມເປັນຮູບປະທຳຫຼາຍຂຶ້ນ ແລະ ເຊື່ອມໂຍງໂດຍກົງກັບການແຂ່ງຂັນດ້ານ AI ລະດັບໂລກ ກັບບໍລິສັດຍັກໃຫຍ່ຢ່າງ Google, Meta ແລະ OpenAI.
ບັນຫາພະລັງງານຂອງສູນຂໍ້ມູນ AI ເທິງໜ້າໂລກ
ສູນຂໍ້ມູນ (Data Center) ຖືເປັນໂຄງສ້າງພື້ນຖານຫຼັກຂອງ AI ໃນຍຸກໃໝ່ ແລະ ເປັນໜຶ່ງໃນຜູ້ໃຊ້ພະລັງງານໄຟຟ້າລາຍໃຫຍ່ທີ່ສຸດຂອງໂລກ. ສູນຂໍ້ມູນ AI ຂະໜາດໃຫຍ່ແຫ່ງໜຶ່ງ ສາມາດໃຊ້ພະລັງງານໄຟຟ້າໃນລະດັບດຽວກັນກັບເມືອງຂະໜາດກາງ ເຮັດໃຫ້ຕົ້ນທຶນພະລັງງານສູງຂຶ້ນຢ່າງຕໍ່ເນື່ອງ ແລະ ເພີ່ມແຮງກົດດັນດ້ານສິ່ງແວດລ້ອມ ໂດຍສະເພາະການປ່ອຍອາຍພິດເຮືອນແກ້ວ ແລະ ການໃຊ້ນ້ຳຈຳນວນມະຫາສານເພື່ອລະບົບລະບາຍຄວາມຮ້ອນ.
ຂໍ້ໄດ້ປຽບຂອງສູນຂໍ້ມູນໃນອາວກາດ
SpaceX ລະບຸວ່າການໃຊ້ພະລັງງານແສງອາທິດໃນອາວກາດມີຄວາມສະຖຽນສູງ ເພາະບໍ່ຖືກລົບກວນຈາກສະພາບອາກາດ ຫຼື ວົງຈອນກາງເວັນ-ກາງຄືນ ເຮັດໃຫ້ຕົ້ນທຶນການດຳເນີນງານ ແລະ ການບຳລຸງຮັກສາຕ່ຳກວ່າສູນຂໍ້ມູນເທິງໜ້າໂລກຢ່າງມີໄນສຳຄັນ. ນອກຈາກນີ້, ສູນຂໍ້ມູນໃນວົງໂຄຈອນຍັງຊ່ວຍຫຼຸດຜ່ອນການໃຊ້ທີ່ດິນ, ຫຼຸດຜ່ອນການໃຊ້ນ້ຳ ແລະ ຫຼຸດຜ່ອນຜົນກະທົບຕໍ່ລະບົບນິເວດໃນລະດັບປະເທດ.
ບົດຮຽນຈາກໂຄງການ Starlink ແລະ ບົດບາດຂອງ Starship
ເຖິງວ່າແນວຄິດດາວທຽມລະດັບລ້ານດວງຈະເບິ່ງຄືວ່າເກີນຈິງ, ແຕ່ SpaceX ເຄີຍໃຊ້ແນວທາງນີ້ມາກ່ອນແລ້ວກັບໂຄງການ Starlink ທີ່ເຄີຍຂໍອະນຸຍາດ FCC ປ່ອຍດາວທຽມສູງສຸດ 42,000 ດວງ. ທີ່ສຳຄັນ, ຄວາມເປັນໄປໄດ້ຂອງໂຄງການນີ້ແມ່ນຂຶ້ນກັບການຫຼຸດຕົ້ນທຶນການຂົນສົ່ງສູ່ອາວກາດ ເຊິ່ງເຊື່ອມໂຍງໂດຍກົງກັບ Starship ຈໍລະວດລຸ້ນໃໝ່ທີ່ສາມາດນຳກັບມາໃຊ້ໃໝ່ໄດ້ທັງໝົດ. SpaceX ຄາດວ່າຫາກ Starship ສາມາດປ່ອຍຈໍລະວດໄດ້ໃນອັດຕາສູງ ມັນຈະມີສັກກະຍະພາບໃນການສົ່ງມວນລວມລະດັບຫຼາຍລ້ານໂຕນຂຶ້ນສູ່ວົງໂຄຈອນຕໍ່ປີ ເຊິ່ງຈະປ່ຽນແປງໂຄງສ້າງຕົ້ນທຶນຂອງອຸດສາຫະກຳອາວກາດຢ່າງສິ້ນເຊີງ.