ງານນະມັດສະການຜາສາດຫີນວັດພູຈໍາປາສັກ ປະຈໍາປີ 2026 ຈັດຂຶ້ນໃນວັນທີ 31 ມັງກອນ - ວັນທີ 2 ກຸມພາ 2026. ມື້ເປີດງານບຸນຢ່າງເປັນທາງການ ຈັດຂຶ້ນໃນຕອນຄໍ່າວັນທີ 31 ມັງກອນ 2026 ຢູ່ເດີ່ນສະຖານບູຮານວັດພູ ໂດຍການເຂົ້າຮ່ວມຂອງທ່ານ ສອນໄຊ ສີພັນດອນ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ, ທ່ານ ນາງ ປານີ ຢາທໍ່ຕູ້ ຮອງປະທານປະເທດແຫ່ງ ສປປ ລາວ, ທ່ານ ປອ ອາລຸນໄຊ ສູນນະລາດ ກຳມະການສູນກາງພັກ, ເລຂາພັກແຂວງຈຳປາສັກ, ແຂກພາຍໃນ ແລະ ຕ່າງປະເທດ ຕະຫຼອດຮອດມວນຊົນຊາວລາວ ແລະ ຊາວ ແຂວງຈໍາປາສັກ ເຂົ້າຮ່ວມ.
ໂອກາດກ່າວເປີດງານ, ທ່ານ ປອ ສຸກສະຫວັນ ວິໄລວົງ ຮອງເລຂາພັກແຂວງ ປະທານຄະນະກໍາມະການປົກຄອງແຂວງຈໍາປາສັກ ຕາງໜ້າອົງຄະນະພັກ - ອົງການປົກຄອງ ແລະ ປະຊາຊົນລາວບັນດາເຜົ່າທົ່ວແຂວງຈໍາປາສັກ ມີຄໍາເຫັນວ່າ: ງານບຸນນະມັດສະການຜາສາດຫີນ ວັດພູຈຳປາສັກ ປະຈໍາປີ 2026 ໃນຄັ້ງນີ້, ເຊິ່ງເປັນການຈັດຂຶ້ນໃນທ່າມກາງບັນຍາກາດ ທີ່ທົ່ວພັກ-ລັດ ແລະ ປວງຊົນລາວ ບັນດາເຜົ່າ ພວມເບີກ ບານມ່ວນຊື່ນ ຊົມເຊີຍຜົນສໍາເລັດຂອງກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XII ຂອງພັກ, ເປັນການສ້າງຂະບວນການຕ້ອນຮັບໃຫ້ແກ່ບັ້ນ ດໍາເນີນການເລືອກຕັ້ງສະມາຊິກ ສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນ ແຂວງ ຊຸດທີ V ແລະ ເປັນການສະເຫຼີມສະຫຼອງຄົບຮອບ 25 ປີ ທີ່ສະຖານບູຮານວັດພູຈໍາປາສັກ ໄດ້ຖືກຮັບຮອງເປັນມໍລະດົກໂລກ.
ໃນໄລຍະຜ່ານມາ ພັກ ແລະ ລັດຖະບານ ກໍຄື ແຂວງຈໍາປາສັກຍາມໃດກໍ ໄດ້ໃຫ້ຄວາມສໍາຄັນ ແລະ ເອົາໃຈໃສ່ຢ່າງຕັ້ງໜ້າ ໃນການອະນຸລັກ ປົກປັກຮັກສາ ແລະ ເສີມຂະຫຍາຍວັດທະນະທໍາ-ຮີດຄອງປະເພນີ ອັນດີງາມຂອງຊາດ ໂດຍສະເພາະເພື່ອວັດທະນະທຳທາງດ້ານ ປູສະນີຍະສະຖານຜາສາດຫີນວັດພູ, ໂດຍມີການຈັດງານສະເຫຼີມ ສະຫຼອງບຸນນະມັດສະການຜາສາດຫີນວັດພູຈຳປາສັກ ໃນທຸກໆປີ ໃນມື້ຂຶ້ນ 15 ຄໍ່າ ເດືອນ 3 ເຊິ່ງເປັນສະຖານທີ່ ອະລິຍະທຳບູຮານເກົ່າແກ່ ທາງດ້ານປະຫວັດສາດ ແລະ ວັດທະນະທຳ ຂອງຊາດລາວເຮົາ, ແມ່ນກຸ່ມສະຖານບູຮານ ທີ່ຖືກຮັບຮູ້ ແລະ ມີຊື່ສຽງມາ ເປັນເວລາຫຼາຍພັນປີ, ເປັນຕົວແທນອັນສໍາຄັນທາງດ້ານສະຖາປັດຕະຍະກຳໃນ ສະໄໝກ່ອນ ແລະ ສະຖານ ບູຮານວັດພູຈໍາປາສັກແຫ່ງນີ້ ໄດ້ຖືກສ້າງຂຶ້ນ ໃນລະຫວ່າງສະຕະວັດ ທີ VII (7) ແຫ່ງຄຣິດ ຕະສັກກະຫຼາດ ເຊິ່ງໄດ້ມີ ການສືບຕໍ່ບູລະນະ-ປະຕິສັງຂອນ ເປັນແຕ່ລະໄລຍະ ອະນຸລັກຮັກສາ ໃຫ້ສົມບູນຄົບຖ້ວນ;
ເມື່ອກ່ອນສະຖານທີ່ບູຮານແຫ່ງນີ້ ແມ່ນເຄີຍຈັດງານ ບູຊາພະສິວະ ໃນຄືນພະຈັນເຕັມດວງ (ຄືນວັນເພັງຂອງເດືອນສາມ) ເຊິ່ງເອີ້ນຄືນນັ້ນວ່າ: “ຊີ ວະຣາຕີ” ເປັນງານບູຊາ, ບວງສວງເທບພຣະເຈົ້າ, ມາຮອດສັດຕະວັດທີ XIII (13) ອິດທິພົນ ຂອງສາສະໜາພຸດ ໄດ້ແຜ່ລາມເຂົ້າມາ ແລະ ເຊື່ອມເຂົ້າກັບສາສະໜາ ຮິນດູ ສະຖານທີ່ບູຮານ ແຫ່ງນີ້ ຈຶ່ງໄດ້ມີການສ້າງ ພະພຸດທະຮູບຂຶ້ນມາ ເພື່ອສັກກາລະບູຊາ ໄປຄວບຄູ່ກັບມີແຖ່ນ ສີວະລຶງຄະ ທີ່ເປັນຕົວແທນໃຫ້ແກ່ ພະສີວະ (ເທບພະເຈົ້າຂອງສາສະໜາຮິນດູ );
ການຈັດ ງານຢູ່ສະຖານບູຮານແຫ່ງນີ້ ແລະ ວັນດຽວກັນນີ້ ຈຶ່ງໄດ້ຄ່ອຍໆ ປັບປ່ຽນມາເປັນງານວັນບຸນ ສໍາຄັນ ທາງພະພຸດທະສາສະໜາ ໂດຍເປັນວັນມາຄະບູຊາ ບຸນນະມັດສະການຜາສາດຫີນ ວັດພູຈຳປາສັກ ຈົນຮອດປະຈຸບັນນີ້.
ພ້ອມນີ້ຍ້ອນຄວາມເອົາໃຈໃສ່ ຂອງພັກ-ລັດ ແລະ ຄວາມເປັນເຈົ້າການຂອງພໍ່ແມ່ປະຊາຊົນ ບັນດາເຜົ່າ ໃນການອະນຸລັກປົກປັກຮັກສາ ຈິ່ງເຮັດໃຫ້ ກຸ່ມຜາສາດຫີນວັດພູ ຖືກຮັບຮອງຈົດ ເຂົ້າທະບຽນມໍລະດົກໂລກ ໂດຍອົງການ ຢູເນັດສະໂກ (UNESCO) ໃນວັນທີ 16 ທັນວາ 2001 ເຊິ່ງມາຮອດປັດຈຸບັນ ກໍເປັນເວລາຄົບຮອບ 25 ປີ ພໍດີ .
#ພາຍໃນງານປີນີ້, ປະກອບມີ ຫຼາກຫຼາຍກິດຈະກຳ ທີ່ໜ້າສົນໃຈ ເປັນຕົ້ນ: (1) ພິທີເປີດ ທີ່ຍິ່ງໃຫຍ່ຕະການຕາ ດ້ວຍລະບົບແສງ-ສີ-ສຽງ ( ປະຫວັດຄວາມເປັນມາ ຂອງການກໍ່ສ້າງ ຜາສາດຫີນວັດພູ), ການສະແດງຮູບພາບປະກອບຕ່າງໆ ໂດຍການ ນໍາໃຊ້ ໂດຣນ (Drone) ຈໍານວນ 590 ລຳ ແລະ ການຍິງ ພຸໄຟ ຈໍານວນ 250 ລູກ, (2) ທ່ຽວງານວາງສະແດງ-ຈໍາໜ່າຍ ສິນຄ້າ, (3) ຊົມການແຂ່ງຂັນກິລາພື້ນເມືອງ, (4) ຊົມການສະແດງ ສິລະປະດົນຕີ, (5) ຮັບປະທານອາຫານທ້ອງຖິ່ນ ທີ່ເປັນເອກະລັກຂອງເມືອງຈຳປາສັກ (ຕົ້ມໄກ່ໃສ່ໄຂ່ ມົດແດງ,…), (6) ຮ່ວມກອງປະຊຸມສໍາມະນາ ວິທະຍາສາດ ໃນຫົວຂໍ້ກ່ຽວກັບການເຂົ້າເປັນ ມໍລະດົກໂລກວັດພູຈໍາປາສັກ ຄົບຮອບ 25 ປີ, (7) ນະມັດສະ ການກາບໄຫວ້-ບູຊາ ພະພຸດ ທະຮູບ ແລະ ໃນຄໍ່າຄືນ ຂອງວັນທີ 01 ກຸມພາ 2026 ເຂົ້າຮ່ວມພິທີທາງສາດສະ ໜາ, ຟັງທຳ ມະ, ສູດປະຣິຕະມຸງຄຸນ ຕະຫຼອດຄືນ ແລະ (
ໃນຕອນເຊົ້າຂອງວັນທີ 02 ກຸມພາ 2026 ເລີ່ມແຕ່ເວລາ 7:00 ໂມງ ເຂົ້າຮ່ວມພິທີຕັກບາດ, ຖວາຍສັງຄະທານ ແດ່ພະສົງ ຫລາຍຮ້ອຍອົງ.
ຕອນແລງ ກໍມີພິທີວຽນທຽນ ເນື່ອງໃນວັນມາຄະບູຊາ. ທັງນີ້, ກໍເພື່ອເສີມຂະຫຍາຍມູນເຊື້ອປະຫວັດສາດ, ຮີດຄອງປະເພນີ ອັນດີງາມຂອງຊາດລາວ ໃຫ້ສາກົນໄດ້ຮັບຮູ້ ພ້ອມທັງເປັນການດຶງດູດນັກທ່ອງທ່ຽວ.
ຂ່າວ-ພາບ: ຈັນທະວີສັກ