ງານສະແດງສິລະປະ ຮູບແຕ້ມເທິງຝາກໍາແພງ ທີ່ແຕ້ມໂດຍຄົນລາວເຮົາ ຢູ່ດ້ານນອກສູນ American Center ໃກ້ກັບ ບໍລິເວນ ທາດດໍາ ນະຄອນຫຼວງວຽງຈັນ ໂດຍຮູບພາບເທິງຝາພະໜັງເປັນຜົນງານການແຕ້ມຮູບ ຈາກນັກສິລະປິນທີ່ມີຊື່ສຽງ ຂອງ ສປປ ລາວ ທີ່ໄດ້ຮັບທຶນ ເອກອັກຄະລັດຖະທູດ ສ.ອາເມລິກາ (ທຶນ AFCP) ໃນການບູລະນະຮັກສາ ສະຖານທີ່ທາງວັດທະນາທໍາ ຕະຫຼອດໄລຍະ 20 ປີ ຢູ່ຫຼາຍແຂວງ ຂອງ ສປປ ລາວ ເຊັ່ນ: ແຂວງ ຫົວພັນ, ແຂວງ ສະຫວັນນະເຂດ ແລະ ແຂວງ ຫຼວງພະບາງ.
ທ່ານ ປີເຕີ້ ເຮ່ມ້ອນ, ເອກອັກຄະລັດຖະທູດ ສະຫະລັດອາເມລິກາ ປະຈໍາ ສປປ ລາວ ກ່າວວ່າ: ໂຄງການແຕ້ມຮູບເທິງຝາກໍາແພງ ສູນ American Center ແມ່ນມີຄວາມໜ້າສົນໃຈຫຼາຍ ເພາະແຕ່ລະເຂດ ທີ່ໄດ້ຮັບທຶນ AFCP ຢູ່ລາວ ລ້ວນແລ້ວແຕ່ ມີປະຫວັດສາດ ແລະ ມີຄວາມງົດງາມທາງດ້ານວັດທະນາທໍາ ຂອງລາວປະກອບຢູ່.
ທ່ານ ທູດ ກ່າວຕື່ມວ່າ: ຢາກໃຫ້ຄົນຕ່າງປະເທດ ທີ່ມາທ່ຽວລາວ ຫຼື ຄົນລາວ ທີ່ບໍ່ມີໂອກາດໄດ້ໄປຕ່າງແຂວງ ຮູ້ວ່າ ຢູ່ ສປປ ລາວ ຍັງມີສະຖານທີ່ທີ່ສວຍງາມທີ່ຫຼາກຫຼາຍ ເພື່ອຊັກຊວນໃຫ້ເຂົາເຈົ້າ ໄດ້ໄປເຫັນຄວາມງາມເຫຼົ່ານັ້ນຕົວຈິງ ດ້ວຍຕົວຂອງເຂົາເຈົ້າເອງ ແລະ ໃນອະນາຄົດ ຄາດວ່າຈະມີໂຄງການໃໝ່ ໃນບ່ອນໃໝ່ອີກຫຼາຍໆບ່ອນ.
ສຳລັບບັນດາທ່ານ ທີ່ໄດ້ຢ່າງກາຍໄປກາຍມາ ທາງທາດດໍາ ກໍສາມາດເຂົ້າໄປມາທ່ຽວຊົມ, ຖ່າຍຮູບ, ເບິ່ງຄວາມງາມ ແລະ ລາຍລະອຽດຂອງຮູບແຕ້ມໄດ້ ໂດຍບໍ່ໄດ້ເສຍຄ່າໃຊ້ຈ່າຍໃດໆ.