ສົກຮຽນໃໝ່ ປີ 2023-2024 ໄດ້ໄຂຂຶ້ນໃນມື້ນີ້ ດ້ວຍບັນຍາກາດອັນຟົດຟື້ນມ່ວນຊື່ນໃນຂອບເຂດທົ່ວປະເທດ. ເມື່ອເວົ້າເຖິງການພັດທະນາປະເທດຊາດ, ຍາມໃດພັກ-ລັດຖະບານ ເຮົາກໍ່ໄດ້ຖືເອົາການພັດທະນາ ຊັບພະຍາກອນມະນຸດ ເປັນວຽກງານສໍາຄັນ, ໄດ້ ເອົາໃຈໃສ່ເປັນພິເສດ ຕໍ່ການສ້າງເງື່ອນໄຂ ແລະ ໂອກາດທີ່ເທົ່າທຽມກັນ ໃຫ້ແກ່ທຸກຄົນໄດ້ເຂົ້າເຖິງການສຶກສາ, ປັບປຸງ ແລະ ຍົກຄຸນນະພາບ ຂອງການຮຽນການສອນ ແລະ ພັດທະນາຊັບພະຍາກອນມະນຸດຂອງຊາດ ໃຫ້ມີຄວາມຮູ້ຄວາມສາມາດ ຕອບສະໜອງ ໄດ້ ກັບຄວາມຮຽກຮ້ອງຕ້ອງການ ຂອງການພັດທະນາ ແນໃສ່ນໍາເອົາປະເທດຊາດ ຫລຸດພົ້ນອອກຈາກຄວາມດ້ອຍພັດທະນາຕາມທິດສັງຄົມນິຍົມ.
ໃນສົກຮຽນ 2022-2023 ຜ່ານມາ, ເຖິງວ່າຈະມີຂໍ້ຫຍຸ້ງຍາກຫລາຍດ້ານກະທົບໃສ່ ແຕ່ຍ້ອນແນວທາງ ນະໂຍບາຍອັນຖືກຕ້ອງຂອງພັກ, ດ້ວຍຄວາມສາມັກ ຄີ ທີ່ເປັນປຶກແຜ່ນແໜ້ນໜາ, ດ້ວຍມູນເຊື້ອດຸໝັ່ນ, ພາກພຽນ ແລະ ມານະອົດທົນ ແລະ ດ້ວຍຄວາມຮັບຜິດຊອບ ທີ່ເປັນເຈົ້າການຕໍ່ໜ້າທີ່ການເມືອງຂອງຕົນ; ພະນັກງານ, ຄູ-ອາຈານ, ທະຫານ, ຕຳຫລວດ, ປະຊາຊົນລາວບັນດາເຜົ່າ ແລະ ນັກຮຽນ-ນັກສຶກສາ ໄດ້ພ້ອມກັນປະກອບສ່ວນຢ່າງໃຫຍ່ຫລວງ ເຂົ້າໃນພາລະກິດປົກປັກຮັກສາ ແລະ ພັດທະນາປະເທດ ຊາດ. ການພັດທະນາດ້ານການສຶກສາ ໃນໜຶ່ງປີຜ່ານມາ ໄດ້ມີຜົນສຳເລັດຫລາຍດ້ານ, ອັນສຳຄັນແມ່ນໄດ້ມີຜົນສຳເລັດຫລາຍດ້ານ ໃນການປະຕິຮູບລະບົບການສຶກສາ, ສາມາດຍົກຄຸນນະພາບ ຂອງວຽກງານກິລາ-ກາຍະກຳ, ປັບປຸງຫລັກສູດການຮຽນ-ການສອນ, ສ້າງໃຫ້ຄູສອນເກັ່ງ, ຫລໍ່ຫລອມໄດ້ນັກຮຽນ-ນັກສຶກສາ ທີ່ມີຄຸນສົມບັດ, ທັງຮຽນດີ-ຮຽນເກັ່ງ, ພັດທະນາໄດ້ໂຮງຮຽນຕົວແບບ, ໂຮງຮຽນສີຂຽວ, ໂຮງຮຽນປອດສິ່ງເສບຕິດ ແລະ ອື່ນໆ. ເດັກຢູ່ເກນອາຍຸເຂົ້າຮຽນ ໄດ້ເຂົ້າເຖິງການສຶກສາ ແລະ ກິລາ ຫລາຍຂຶ້ນ; ນັກ ຮຽນ-ນັກສຶກສາ ໄດ້ມີຄວາມຕັ້ງໃຈ ຕໍ່ການຮຽນດ້ວຍຕົນເອງ ແລະ ມີຜົນການຮຽນດີຂຶ້ນ. ໂດຍພື້ນຖານແລ້ວ, ວຽກງານສຶກສາທິການ ແລະ ກິລາ ປີຜ່ານມາ ໄດ້ສືບຕໍ່ຂະຫຍາຍຕົວທາງດ້ານປະລິມານ ແລະ ດ້ານຄຸນນະພາບ, ບັນລຸຕາມມາດຕະຖານ, ຮັບປະກັນຄຸນນະ ພາບການສຶກສາແຫ່ງຊາດ ແລະ ໃນບາງດ້ານ ແມ່ນສາມາດຍົກລະດັບມາດຕະຖານ ການສຶກສາຂອງພວກເຮົາ ໃຫ້ຫຍັບໃກ້ເຂົ້າ ແລະ ເທົ່າທຽມກັບມາດຕະຖານ ຂອງບັນດາປະເທດໃນພາກພື້ນ ແລະ ສາກົນ. ແຕ່ເຖິງຢ່າງໃດ ພວກເຮົາກໍຍັງຜະເຊີນກັບອຸປະສັກ ແລະ ສິ່ງທ້າທາຍທົດສອບຫລາຍປະການ ເປັນຕົ້ນແມ່ນ ການຂະຫຍາຍຕາໜ່າງການສຶກສາ, ໂດຍສະເພາະ ການສຶກສາກ່ອນໄວຮຽນໄປສູ່ເຂດຊົນນະບົດ ແລະ ເຂດຫ່າງໄກສອກຫລີກ, ການບັນລຸເປົ້າໝາຍ ການສຶກສາເພື່ອທຸກຄົນ ກໍຄື ເປົ້າໝາຍສະຫັດສະວັດດ້ານການພັດ ທະນາ ຍັງມີບາງຕົວຊີ້ບອກກໍຍັງເປັນສິ່ງທ້າທາຍ; ຄວາມສະເໝີພາບ ລະຫວ່າງ ຍິງ-ຊາຍ; ການເຂົ້າເຖິງການສຶກສາ ທີ່ຍັງແຕກໂຕນກັນ ລະຫວ່າງ ຕົວເມືອງ, ຊົນນະບົດ ແລະ ເຂດຫ່າງໄກສອກຫລີກ, ໂດຍສະເພາະ ໃນສາຍອາຊີວະສຶກສາ ແລະ ການສຶກສາຊັ້ນສູງ; ຄ່ານິຍົມຂອງຜູ້ປົກຄອງ ແລະ ຜູ້ຮຽນ ທີ່ຕ້ອງການການສຶກສາຂັ້ນປະລິນຍາຕີຂຶ້ນໄປ ແລະ ຍັງບໍ່ທັນເຫັນຄວາມສໍາຄັນ ຂອງການສຶກສາຂັ້ນ ອາຊີວະສຶກສາເທົ່າທີ່ຄວນ; ການສ້າງສີມືແຮງງານ ກໍ່ຍັງບໍ່ທັນສອດຄ່ອງກັບຄວາມຕ້ອງການ ຂອງຕະຫລາດແຮງງານ ແລະ ອື່ນໆ ເຊິ່ງບັນຫາເຫລົ່ານີ້, ພວກເຮົາຈະຕ້ອງໄດ້ສືບຕໍ່ສຸມໃສ່ແກ້ໄຂໃຫ້ຕົກໄປໃຫ້ໄດ້.
ຢ່າງໃດກໍ່ຕາມ, ເພື່ອບັນລຸເປົ້າໝາຍການພັດທະນາໄປຕາມວິໄສທັດຂອງຂະແໜງການການສຶກສາ ທີ່ໄດ້ກຳນົດໄວ້ຄື: ” ຮອດປີ 2030 ພົນລະເມືອງລາວທຸກຄົນ ໄດ້ຮັບການສຶກສາທີ່ມີຄຸນນະພາບ ຢ່າງສະເໝີພາບ ແລະ ເທົ່າທຽມກັນ ເພື່ອໃຫ້ເຂົາເຈົ້າ ໄດ້ ພັດທະນາຕົນເອງ ກາຍເປັນພົນລະເມືອງດີຂອງຊາດ, ມີຄຸນສົມບັດ, ມີສຸຂະພາບເຂັ້ມແຂງ, ມີຄວາມຮູ້ຄວາມສາມາດສູງ, ມີຄວາມເປັນມືອາຊີບ ເພື່ອພັດທະນາປະເທດຊາດ ໃຫ້ສີວິໄລຍືນຍົງ, ສາມາດເຊື່ອມໂຍງ, ແຂ່ງຂັນກັບພາກພື້ນ ແລະ ສາກົນໄດ້” ນັ້ນ, ຜູ້ບໍລິ ຫານການສຶກສາ ແລະ ຄູ-ອາຈານ ຈະຕ້ອງສູ້ຊົນສືບຕໍ່ ເພີ່ມທະວີຄວາມຮັບຜິດຊອບ ໃນການປະຕິບັດໜ້າທີ່ການເມືອງຂອງຕົນ ດ້ວຍຄວາມບໍລິສຸດ, ຊື່ສັດ ແລະ ນໍ້າໃຈເສຍສະຫລະສູງ ໃນການບໍາລຸງສ້າງນັກຮຽນ-ນັກສຶກສາ ທີ່ເປັນກຳລັງແຮງຂອງຊາດ ທັງໃນປັດຈຸ ບັນ ແລະ ອະນາຄົດ; ສະຖານການສຶກສາ ເປັນເຈົ້າການໃນການປະຕິບັດກົດໝາຍ ແລະ ລະບຽບການທີ່ກ່ຽວຂ້ອງ ກັບການສຶກສາ ເພື່ອບໍ່ເປີດໂອກາດໃຫ້ມີການເຄື່ອນໄຫວ ແລະ ສິ່ງລໍ້ລວງ, ຊັກຈູງ ນັກຮຽນ-ນັກສຶກສາ ໄປໃນທາງທີ່ເສື່ອມເສຍ ແລະ ເປັນໄພຕໍ່ການ ສຶກສາ; ນັກຮຽນ-ນັກສຶກສາ ຕ້ອງເອົາໃຈໃສ່ ແລະ ຕັ້ງໃຈຮໍ່າຮຽນ, ຖືເອົາການຮໍ່າຮຽນ ເປັນການກໍ່ສ້າງອະນາຄົດຂອງຕົນ ກໍຄື ອະນາຄົດຂອງຊາດ; ກໍາລັງແຮງຂອງທົ່ວສັງຄົມ ປະກອບສ່ວນໃນວຽກງານການສຶກສາ ແລະ ກິລາ ຢ່າງຕັ້ງໜ້າ ຖືການພັດທະນາວຽກງານ ດັ່ງກ່າງ ເປັນຂອງທົ່ວປວງຊົນ ເພື່ອສ້າງຊັບພະຍາ ກອນມະນຸດທີ່ນັບມື້ມີຄຸນນະພາບ, ສາມາດມາດຕອບສະໜອງ ໄດ້ຄວາມຮຽກຮ້ອງຕ້ອງການຂອງການພັດທະນາໃນອະນາຄົດ.
ເພື່ອເຮັດໃຫ້ສົກຮຽນໃໝ່ ປີ 2023-2024 ດຳເນີນໄປດ້ວຍບັນຍາກາດທີ່ດີ ແລະ ບັນລຸໄດ້ຜົນສຳລັດ ຕາມແຜນການທີ່ວາງໄວ້; ຄະນະພັກຄະນະນໍາ, ຜູ້ບໍລິຫານການສຶກສາ, ຄະນະພັດທະນາການສຶກສາທຸກຂັ້ນ ແລະ ທຸກພາກສ່ວນໃນສັງຄົມ ສືບຕໍ່ເປັນ ເຈົ້າການ ປະກອບສ່ວນຢ່າງຕັ້ງໜ້າໃນການພັດທະນາການສຶກສາ, ອຳນວຍຄວາມສະດວກຕາມເງື່ອນໄຂ ແລະ ຄວາມສາມາດຕົວຈິງຂອງຂະແໜງການ ແລະ ທ້ອງຖິ່ນດ້ານຕ່າງໆ ເພື່ອຮັບໃຊ້ໃຫ້ແກ່ການສອນ-ການຮຽນ ຕະຫລອດສົກຮຽນໃໝ່ ໃຫ້ໄດ້ຮັບຜົນດີມີຄຸນນະພາບສູງຂຶ້ນໄປເລື້ອຍໆ.