ອີງຕາມການລາຍງານຂ່າວຈາກ ສໍານັກຂ່າວສານຕ່າງປະເທດ (https://www.trtworld.com) ລາຍງານວ່າ, ໃນກອງປະຊຸມວາລະພິເສດ ຄົບຮອບ 30 ປີ ຄວາມສຳພັນສະມາຄົມປະຊາຊາດ ເອເຊຍ ຕາເວັນອອກສ່ຽງໃຕ້ ຫຼື ອາຊຽນ (Special ASEAN-India Foreign Ministers’ Meeting) ທີ່ຈັດຂຶ້ນຢູ່ທີ່ ນິວເດລລີ, ປະເທດ ອິນເດຍ ໃນລະຫວ່າງ ວັນທີ 15-17 ມິຖຸນາ 2022 ນີ້, ໂດຍ ສິງກະໂປ ແລະ ອິນເດຍ ຮຽກຮ້ອງໃຫ້ ອາຊຽນ ແລະ ອິນເດຍ ຮັດແໜ້ນຄວາມສຳພັນການຮ່ວມມືໃຫ້ຫລາຍຂຶ້ນທ່າມກາງສະຖານະການ ຣັດເຊຍ ແລະ ຢູເຄຣນ ຍັງຄັ່ງຮ້ອນລວມທັງ ສ.ອາເມຣິກາ ແລະ ຈີນ ມີການແຂ່ງຂັນກັນຫລາຍຂຶ້ນຈົນເປັນໄພຕໍ່ສັນຕິພາບ ແລະ ສະຖຽນລະພາບໃນພາກພື້ນ.
ໃນກອງປະຊຸມວາລະພິເສດ ດັ່ງກ່າວ, ລັດຖະມົນຕີຕ່າງປະເທດ ອິນເດຍ ໄດ້ກ່າວວ່າ: ອາຊຽນ ແລະ ອິນເດຍ ພວມຜະເຊີນຜົນກະທົບຈາກສະພາບການຂອງໂລກເຄັ່ງຮ້ອນຂຶ້ນ ກ່ຽວກັບຄວາມໝັ້ນຄົງ ດ້ານອາຫານ ແລະ ພະລັງງານ ຊຶ່ງ ອິນເດຍ ສະໜັບສະໜູນ ອາຊຽນ ທີ່ເຂັ້ມແຂງເປັນໜຶ່ງດຽວ ແລະ ຄວາມຈະເລີນຮຸ່ງເຮືອງຢ່າງເຕັມສ່ວນເພາະ ອາຊຽນ ໄດ້ຮັບການຍອມຮັບກ່ຽວກັບຄວາມເປັນກາງໃນພາກພື້ນ ອິນໂດ-ປາຊີຟິກ ພ້ອມໃຊ້ໂອກາດນີ້ ເນັ້ນໃສ່ເລື່ອງ ອາຊຽນ ແລະ ອິນເດຍ ຈຳເປັນຕ້ອງເສີມສ້າງຄວາມເຊື່ອມໂຍງ ທາງບົກ ແລະ ທາງທະເລລະຫວ່າງກັນໃຫ້ຫລາຍຂຶ້ນກວ່າເກົ່າ.