ກອງປະຊຸມລະດັບຫົວໜ້າຄະນະ ກິລາ ຊີເກມ ຄັ້ງທີ 32 ໄດ້ສະເໜີ ໃຫ້ ລາວ ເປັນເຈົ້າພາບຈັດງານມະຫະກຳກິລາ ຊີເກມ ຄັ້ງທີ 35 ປີ 2029 ຖັດຈາກ ໄທ ຈັດງານກິລາຊີເກມຄັ້ງທີ 33 ປີ 2025 ແລະ ປະເທດ ອິນໂດເນເຊຍ ເປັນເຈົ້າພາບ ຈັດງານກິລາ ຊີເກມ ຄັ້ງທີ 34 ໃນປີ 2027, ຊຶ່ງກອງປະຊຸມດັ່ງກ່າວ ໄດ້ຈັດຂຶ້ນເມື່ອບໍ່ດົນມານີ້ ທີ່ປະເທດ ກຳປູເຈຍ ເພື່ອກຽມຮັບກຽດເປັນເຈົ້າພາບຂອງ ກຳປູເຈຍ ຈັດງານມະຫະກຳ ກິລາ ຊີເກມ ຄັ້ງທີ 32 ໃນປີ 2023 ພາຍໃຕ້ການເປັນປະທານຂອງ ທ່ານ ທອງຄູນ ຮອງລັດຖະມົນຕີກະຊວງວັດທະນະທຳ ແລະ ການທ່ອງທ່ຽວ ແຫ່ງຣາຊະອານາຈັກ ກຳປູເຈຍ, ມີບັນດາຕາງໜ້າຄະນະນຳຈາກ 11 ຊາດ ໃນ ອາຊຽນ ເຂົ້າຮ່ວມ.
ໃນກອງປະຊຸມຄັ້ງນີ້, ທາງເຈົ້າພາບ ກຳປູເຈຍ ກໍໄດ້ມີການສະເໜີແຜນການຈະຈັດງານມະຫະກຳ ກິລາ ຊີເກມ ຄັ້ງທີ 32 ໃນປີ 2023 ພ້ອມທັງປະກອບຄຳຄິດຄຳເຫັນແລກປ່ຽນບົດຮຽນ ກັບບັນດາຕາງໜ້າຄະນະນຳຈາກ 11 ຊາດ, ໃນນັ້ນ ທາງເຈົ້າພາບກໍໄດ້ສະເໜີຈະຈັດການແຂ່ງຂັນຢູ່ 4 ຈຸດໃຫຍ່ໆ ໃນຣາຊະອານາຈັກ ກຳປູເຈຍ, ພ້ອມກັນນັ້ນ ມາເລເຊຍ ແລະ ອິນໂດເນເຊຍ ກໍໄດ້ສະເໜີເອົາ ກິລາ ປັນຈັກສີລັດ ບັນຈຸເຂົ້າແຂ່ງຂັນ, ສ່ວນ ທາງ ລາວ ກໍໄດ້ສະເໜີໃຫ້ ບັນຈຸ ກິລາວູຊູ ແລະ ລາວ ກໍຂໍຮັບເອົາຄຳສະເໜີ ໃຫ້ເປັນເຈົ້າພາບ ຈັດງານມະຫະກຳກິລາ ຊີເກມ ຄັ້ງທີ 35 ປີ 2029 ກັບໄປສະເໜີຕໍ່ລັດຖະບານ ແລະ ຈະໄດ້ຕອບໃນກອງປະຊຸມຄະນະມົນຕີ ຊີເກມ ໃນຄັ້ງຕໍ່ໄປ ຊຶ່ງຈະຈັດຂຶ້ນໃນກາງ ເດືອນ ມິຖຸນາ ນີ້.
ມາຮອດປັດຈຸບັນ ເຈົ້າພາບ ກຳປູເຈຍ ໄດ້ມີຄວາມຄືບໜ້າ ແລະ ມີຄວາມພ້ອມຫຼາຍດ້ານໃນການຈັດງານມະຫະກຳກິລາຊີເກມ ຄັ້ງທີ 32 ໃນປີ 2023, ໂດຍສະເພາະທາງດ້ານການປ້ອງກັນ ໂຄວິດ-19 ທາງເຈົ້າພາບ ກຳປູເຈຍ ໄດ້ມີການລະດົມປະຊາຊົນໃຫ້ມີການສັກວັກຊີນ ເປັນທີ່ຮຽບຮ້ອຍ ແລະ ມີແນວໂນ້ມດີ ຂຶ້ນເລື້ອຍໆ.
ແຫຼ່ງຂໍ້ມູນ: ວຽງຈັນທາມ