ໃນວັນທີ 5 ຕຸລາ 2026 ກົມອາຫານ ແລະ ຢາ ກະຊວງສາທາລະນະສຸກ, ອອກໜັງສືແຈ້ງການສະບັບເລກທີ 4594/ກອຢ ກ່ຽວກັບການລົງຕິດຕາມກວດກາຜະລິດຕະພັນເສີມສຸຂະພາບ ຊື່ການຄ້າ BERROCA PERFORMANCE ORANGE FLAVOR ທີ່ນໍາເຂົ້າຈາກຕ່າງປະເທດແບບບໍ່ຖືກຕ້ອງ ທີ່ພົບເຫັນໃນນະຄອນຫລວງວຽງຈັນ.
ກົມອາຫານ ແລະ ຢາ, ກະຊວງສາທາລະນະສຸກ ແຈ້ງໃຫ້ຊາບວ່າ ໃນປັດຈຸບັນໄດ້ມີຜະລິດຕະພັນເສີມສຸຂະພາບ ທີ່ນໍາເຂົ້າບໍ່ຖືກຕ້ອງ ຈໍລະຈອນຈໍາໜ່າຍໃນຮ້ານຂາຍຢາ ທີ່ພົບເຫັນແມ່ນເຂດນະຄອນຫຼວງວຽງຈັນ ຜະລິດຕະພັນດັ່ງກ່າວ ບໍ່ໄດ້ຮັບອະນຸຍາດ ຈາກກົມອາຫານ ແລະ ຢາ, ກະຊວງສາທາລະນະສຸກ, ເພື່ອຮັບປະກັນຄຸນນະພາບຜະລິດຕະພັນເສີມສຸຂະພາບ ທີ່ຈໍລະຈອນຈໍາໜ່າຍ ຢູ່ ສປປ ລາວ, ສະເໜີໃຫ້ແຕ່ລະພາກສ່ວນກ່ຽວຂ້ອງ ປະຕິບັດ ຄື:
. ສະເໜີໃຫ້ກອງກວດກາ ອາຫານ ແລະ ຢາ, ພະແນກສາທາລະນະສຸກແຂວງ ແລະ ນະຄອນຫຼວງ ໃນທົ່ວປະເທດ ຊີ້ນໍາ ເຈົ້າໜ້າທີ່ກວດກາ ອາຫານ ແລະ ຢາ ທີ່ຢູ່ໃນຄວາມຮັບຜິດຊອບຂອງຕົນ ເພື່ອລົງຕິດຕາມກວດກາຜະລິດຕະພັນເສີມສຸຂະພາບ ຊື່ການຄ້າ BERROCA PERFORMANCE ORANGE FLAVOR ທີ່ນໍາເຂົ້າບໍ່ຖືກຕ້ອງ ທີ່ຈໍລະຈອນຈໍາໜ່າຍໃນຂອບເຂດທົ່ວປະເທດ ຊຶ່ງມີຂໍ້ສັງເກດດັ່ງ ລຸ່ມນີ້:
ຜະລິດຕະພັນ ຊື່ການຄ້າ: (BERROCA PERFORMANCE ORANGE FLAVOR) ບໍລິສັດ ດີເຄເອັດສ໌ເຮັດສ໌ລາວ ຈຳກັດ ເປັນຜູ້ນໍາເຂົ້າຖືກຕ້ອງ
1). ໄດ້ຮັບການຂຶ້ນທະບຽນຈາກກົມອາຫານ ແລະ ຢາ
2). ຂະໜາດບັນຈຸ 15 ເມັດ/ຫຼອດ ແລະ ແບບຊອງ 1 ກ່ອງມີ 24 ຊອງ
3). ມີເລກຂຶ້ນທະບຽນນໍາກົມອາຫານ ແລະ ຢາ ເລກທີ 08 HSI 0042/17
4. ມີສະຫລາກພາສາລາວ
ສ່ວນຜະລິດຕະພັນ ຊື່ການຄ້າ: (BERROCA PERFORMANCE ORANGE FLAVOR) ທີ່ນໍາເຂົ້າບໍ່ຖືກຕ້ອງ:
1). ບໍ່ໄດ້ຮັບການຂຶ້ນທະບຽນຈາກກົມອາຫານ ແລະ ຢາ
2). ຂະໜາດບັນຈຸ 10 ເມັດ/ຫຼອດ, 1 ກ່ອງ
3). ບໍ່ມີເລກທະບຽນຂອງກົມອາຫານ ແລະ ຢາ ແລະ ບໍ່ໄດ້ຕິດສະຫຼາກ ເປັນພາສາລາວ
. ຖ້າພົບເຫັນຜະລິດຕະພັນເສີມສຸຂະພາບດັ່ງກ່າວໃຫ້ຢຶດ ແລະ ເກັບຮັກສາໄວ້ນໍາກອງກວດກາອາຫານ ແລະ ຢາ ແລະ ຂະແໜງອາຫານ ແລະ ຢາແຂວງ, ພ້ອມທັງເກັບກຳຂໍ້ມູນໃນການສະໜອງ ຫລື ແຫຼ່ງທີ່ມາໃຫ້ລະອຽດ ແລ້ວລາຍງານໃຫ້ກົມອາຫານ ແລະ ຢາ ຊາບ.
. ໃຫ້ສືບຕໍ່ປະສານ ແລະ ວາງແຜນແກ້ໄຂຕາມລະບຽບການ.
ທີ່ມາ: ກົມອາຫານ ແລະ ຢາ