ສປປ ລາວ ຖືກຈັດຢູ່ໃນອັນດັບ 75 ຈາກທັງໝົດ 110 ປະເທດ ແລະ ເຂດເສດຖະກິດ ໃນດັດຊະນີການພັດທະນາການທ່ອງທ່ຽວ (Travel & Tourism Development Index 2026: TTDI) ຂອງສະພາເສດຖະກິດໂລກ (World Economic Forum: WEF) ຕາມລາຍງານປີ 2026 ທີ່ເຜີຍແຜ່ໃນວັນທີ 25 ກັນຍາ 2026.
ຂໍ້ມູນທີ່ເຜີຍແຜ່ໂດຍ VnExpress International ລະບຸວ່າ ໃນກຸ່ມອາຊຽນ ສິງກະໂປຢູ່ອັນດັບ 13, ອິນໂດເນເຊຍອັນດັບ 23, ມາເລເຊຍອັນດັບ 26, ໄທອັນດັບ 38, ຫວຽດນາມອັນດັບ 52, ຟີລິບປິນອັນດັບ 57 ແລະ ລາວອັນດັບ 75.
ເຖິງແມ່ນວ່າລາວຈະຢູ່ອັນດັບ 75 ໃນພາບລວມ ແຕ່ຄະແນນດັດຊະນີຂອງລາວກໍເພີ່ມຂຶ້ນ 6,1% ໃນຊ່ວງປີ 2024-2026 ເຊິ່ງເປັນອັດຕາການປັບປຸງສູງເປັນອັນດັບ 3 ຂອງໂລກ ຮອງຈາກອານບານີ ທີ່ເພີ່ມຂຶ້ນ 7,0% ແລະ ຫວຽດນາມ 6,3%.
ດັດຊະນີ TTDI ບໍ່ໄດ້ວັດແຕ່ຈຳນວນນັກທ່ອງທ່ຽວ ຫຼື ລາຍຮັບຈາກການທ່ອງທ່ຽວເທົ່ານັ້ນ ແຕ່ຍັງປະເມີນປັດໄຈທີ່ຊ່ວຍໃຫ້ການທ່ອງທ່ຽວເຕີບໂຕຢ່າງຍືນຍົງ ເຊັ່ນ ສະພາບແວດລ້ອມທາງທຸລະກິດ, ຄວາມປອດໄພ, ໂຄງລ່າງພື້ນຖານ, ການເຊື່ອມຕໍ່ທາງອາກາດ, ການບໍລິການນັກທ່ອງທ່ຽວ, ຊັບພະຍາກອນທຳມະຊາດ ແລະ ວັດທະນະທຳ ລວມເຖິງຄວາມຍືນຍົງຂອງຂະແໜງການ.
ຜົນການປະເມີນຈຶ່ງສະທ້ອນທັງສະຖານະຂອງລາວໃນພາບລວມ ແລະ ຄວາມຄືບໜ້າໃນການພັດທະນາ. ການຮັກສາອັດຕາການພັດທະນານີ້ໃຫ້ຕໍ່ເນື່ອງ ຄຽງຄູ່ກັບການຍົກລະດັບໂຄງລ່າງ ແລະ ຄຸນນະພາບການບໍລິການ ຈະເປັນປັດໄຈສຳຄັນຕໍ່ການເພີ່ມຂີດຄວາມສາມາດໃນການແຂ່ງຂັນຂອງການທ່ອງທ່ຽວລາວໃນອະນາຄົດ.